চিনাক্ত বিদেশীৰ পৰিয়ালৰ কাৰো নাম অন্তর্ভুক্ত নহয় এন আৰ চিত

 ৱেব সংবাদঃ কেৱল চিনাক্ত বিদেশীয়েই নহয়, বিদেশীজনৰ পৰিয়ালৰ কোনো সদস্যৰেই নাম এন আৰ চিত অন্তর্ভুক্ত নহয়৷ এন আৰ চিৰ খচৰাত লাখৰ ভিতৰত চিনাক্ত বিদেশীৰ নাম অন্তর্ভুক্ত হোৱাৰ পাছত এই ক্ষেত্রত কঠোৰ স্থিতি গ্রহণ কৰি এন আৰ চি কর্তৃপক্ষই ইতিমধ্যে চিনাক্ত বিদেশীসকলৰ নাম কর্তন কৰিছে৷ চিনাক্ত বিদেশীসকলৰ লগতে শেহতীয়াকৈ সেইসকলৰ সতি-সন্ততি তথা পৰিয়ালৰ অন্যান্য সদস্যসকলৰ নাম যাতে এন আৰ চিৰ তালিকাত অন্তর্ভুক্ত নহয়৷ এই ক্ষেত্রত অধিক সচেতনতা অৱলম্বন কৰিছে এন আৰ চি কর্তৃপক্ষই৷

এন আৰ চিৰ ৰাজ্যিক সমন্বয়ৰ প্রতীক হাজেলাই যোৱা ২ মে’ত প্রতিখন জিলাৰ উপায়ুক্তলৈ পত্র প্রেৰণ কৰি এন আৰ চিৰ তালিকাত যদিহে চিনাক্ত বিদেশীৰ পৰিয়ালৰ কোনো সদস্যৰ নাম অন্তর্ভুক্ত হৈছে সেইসকলৰ নাম কর্তন কৰিবলৈ নির্দেশ দিছে৷ লগতে সীমান্ত আৰক্ষীক চিনাক্ত বিদেশীৰ ভাতৃ-ভগ্নী, সতি-সন্ততিসহ পৰিয়ালৰ নাম-ঠিকনা সংগ্রহ কৰিবলৈ এন আৰ চি কর্তৃপক্ষই নির্দেশ দিছে৷ যাতে এন আৰ চিৰ খচৰা তালিকাত সোমোৱা চিনাক্ত বিদেশীৰ পৰিয়ালৰ নাম মূল তালিকাৰ পৰা বাদ দিব পৰা যায়৷

উল্লেখযোগ্য যে এন আৰ চিৰ খচৰাত লাখে লাখে বাংলাদেশীৰ নাম অন্তর্ভুক্ত হৈছে৷ ‘ডি’ ভোটাৰ আৰু চিনাক্ত বিদেশীৰ ক্ষেত্রত এন আৰ চি কর্তৃপক্ষৰ স্থিতি স্পষ্ট আছিল যদিও ভাৰতত জন্মলাভ কৰা চিনাক্ত বিদেশীৰ সতি-সন্ততি, ভাতৃ-ভগ্নীসহ পৰিয়ালৰ অন্যান্য সদস্যৰ নাম এন আৰ চিত সোমাব নে নাই এই সন্দর্ভত কোনো স্পষ্ট নির্দেশনা নাছিল৷ এন আৰ চিৰ ৰাজ্যিক সমন্বয়ক প্রতীক হাজেলাই ২ মে’ত জিলাৰ উপায়ুক্তসকললৈ প্রেৰণ কৰা পত্রত গুৱাহাটী উচচ ন্যায়ালয়ে ২ মে’, ২০১৭ত প্রদান কৰা ৰায়ৰ উদ্ধৃতি দাঙি ধৰা হৈছে৷ গুৱাহাটী উচচ ন্যায়ালয়ে উক্ত ৰায়ত স্পষ্টভাৱে কৈছিল যে বিদেশী ন্যায়াধিকৰণে বিদেশী বুলি চিনাক্ত কৰা লোকৰ পৰিয়ালৰ সদস্যসকলকো বিদেশী বুলি গণ্য কৰা হ’ব৷

গুৱাহাটী উচচ ন্যায়ালয়ৰ এই গুৰুত্বপূর্ণ ৰায় মানি লৈ এন আৰ চি কর্তৃপক্ষই সকলো জিলাৰ উপায়ুক্ত আৰু প্রতিখন জিলাৰ সীমান্ত আৰক্ষীৰ অধীক্ষকক দিয়া শেহতীয়া এই নির্দেশে গুৰুত্ব লাভ কৰিছে৷ বিদেশীমুক্ত এন আৰ চি প্রস্তুতৰ ক্ষেত্রত এন আৰ চি কর্তৃপক্ষৰ এই নির্দেশ অতি তাৎপর্যপূর্ণ বিবেচিত হৈছে৷ ইফালে, চিনাক্ত-অচিনাক্ত বিদেশী অঙহী-বঙহীসহ লাখ লাখ বাংলাদেশীয়ে এন আৰ চিৰ খচৰাত নাম সুমুৱাবলৈ সক্ষম হৈছে৷

প্রতীক হাজেলাৰ নির্দেশৰ পাছত লাখ লাখ বিদেশীৰ নাম কর্তন নিশ্চিত হোৱাত মূৰ গৰম হৈছে আমছু, জমিয়তৰ দৰে বাংলাদেশী মুছলমানৰ স্বার্থতত মাত মাতি অহা সংগঠনৰ৷ এই সংগঠনকেইটাই বিগত বর্ষত উচচ ন্যায়ালয়ে দিয়া গুৰুত্বপূর্ণ ৰায়ক প্রত্যাহবান জনাই এতিয়া গোপনে উচচতম ন্যায়ালয়ৰ দ্বাৰস্থ হোৱাৰ কুচকাৱাজ চলাইছে৷

মুঠৰ ওপৰত বিদেশীমুক্ত এন আৰ চি প্রস্তুতত জমিয়ত, আমছুৰ দৰে একাংশ সংগঠনে যে প্রতি মুহূর্তত বাধাৰ সৃষ্টি কৰি আহিছে সেয়া বিভিন্ন সময়ত প্রতীয়মান হৈছে৷ নাগৰিকত্ব আইনৰ সংশোধনী বিধেয়কখনক লৈ খিলঞ্জীয়া জনসাধাৰণ প্রতিবাদমুখৰ হৈ থকাৰ সময়তে প্রতিক্রিয়াশীল আন এটা চক্রই বাংলাদেশী মুছলমানক স্বদেশী সজাবলৈ এইদৰেই চেষ্টা অব্যাহত ৰাখিছে৷