ৱেব সংবাদঃ যি সময়ত শিলৰ নাটনিৰ বাবে ৰাজ্যত পথ নির্মাণ, গৃহ নির্মাণত বিৰূপ প্রভাৱ পৰিছে, সেই সময়তেই বাংলাদেশলৈ অবৈধভাৱে দৈনিক পঠোৱা হৈছে হাজাৰ হাজাৰ ঘন ছেঃ মিঃ শিল৷ বাংলাদেশলৈ শিল ৰপ্তানিৰ নামত একপ্রকাৰ বৃহৎ ছিণ্ডিকেট গঢ়ি উঠিছে৷ ধুবুৰীৰ ভাৰত-বাংলা সীমান্তত অৱস্থিত সোণাহাট আন্তর্তিক বাণিজ্য কেন্দ্রৰ জৰিয়তে বাংলাদেশলৈ ৰপ্তানি হোৱা শিলৰ নামত এই ছিণ্ডিকেট গঢ়ি উঠিছে৷
ভূটানৰ পৰা ক্রয় কৰা শিলক লৈ গঢ়ি উঠা বৃহৎ ছিণ্ডিকেটত কেন্দ্রীয় চৰকাৰৰ কাষ্টম বিভাগ আৰু ৰাজ্য চৰকাৰৰ বন, পৰিবহণ বিভাগৰ উপৰি আৰক্ষী প্রশাসন জড়িত থকাৰ অভিযোগ উঠিছে৷ বাংলাদেশলৈ কয়লা সৰবৰাহৰ নামত গঢ়ি উঠা ছিণ্ডিকেটৰ দৰেই এইবাৰ শিলক লৈ চলা ছিণ্ডিকেটে ব্যাপক চর্ লাভ কৰিছে৷ এই ছিণ্ডিকেটৰ সৈতে শাসকীয় বিধায়ক এগৰাকীৰ আশিসধন্য সৰকাৰ উপাধিৰ পালিনেতা জড়িত থকাৰ অভিযোগ উত্থাপন হৈছে৷
উল্লেখযোগ্য যে ভূটানৰ শিল পশ্চিম বংগৰ আলিপুৰ দুৱাৰ-কামাখ্যাগুৰি হৈ বক্সিৰহাট সীমাইদি সোণাহাটৰ আন্তজার্তিক বাণিজ্য কেন্দ্রলৈ আহে৷ ভূটানৰ পৰা শিল ভাৰতীয় ব্যৱসায়ীয়ে প্রতি ছেঃমিটাৰত ৭০০ টকাকৈ ক্রয় কৰে৷ অসমত প্রৱেশ কৰাৰ বাবে বক্সিৰহাটত ৰাজ্যৰ বন বিভাগে প্রতিখন ট্রাকৰ বিপৰীতে ৫০০ টকা সংগ্রহ কৰে৷ সেইদৰে সীমা শুল্কও সোণাহাট বাণিজ্য কেন্দ্রত ব্যৱসায়ীসকলে আদায় দিব লাগে৷
বৈধভাৱে আন্তর্তিক বাণিজ্যৰ ক্ষেত্রত থকা সকলো নীতি-নিয়ম এইক্ষেত্রত শিল সৰবৰাহীসকলে পালন কৰে৷ কিন্তু কয়লাৰ দৰে শিলৰ ক্ষেত্রতো অভাৰল’ডিঙৰ নামতেই ছিণ্ডিকেট চলি আছে৷ বাংলাদেশক বিক্রী কৰা প্রতি ছেঃ মিঃ শিলৰ নির্ধাৰিত মূল্য হ’ল ১৪০০ টকা৷ কিন্তু কেন্দ্রীয় সীমা শুল্ক, ৰাজ্যৰ বন-পৰিবহণ বিভাগ, আৰক্ষী-প্রশাসন সকলোকে মেনেজ কৰি পশ্চিম বংগ আৰু অসমৰ প্রভাৱশালী ব্যৱসায়ী চক্রটোৱে ৰাজহ আদায় দিয়াতকৈ দুগুণ পৰিমাণৰ শিল অভাৰল’ডিঙকৈ প্রেৰণ কৰি আছে৷
অভাৰল’ডিঙত পঠোৱা শিলখিনিৰ মূল্যও নির্ধাৰিত ১৪০০ টকাৰ বিপৰীতে বেছিকৈ সংগ্রহ কৰে ব্যৱসায়ীসকলে৷ সপ্তাহৰ দেওবাৰ আৰু শুকুৰবাৰক বাদ দি আনকেইটা দিনত দৈনিক ১২৫-১৩০খন ট্রাক-ডাম্পাৰেৰে বাংলাদেশলৈ শিল ৰপ্তানি কৰা হয়৷ ৰাজ্যৰ বন বিভাগে প্রতিদিনে বক্সিৰহাটত প্রায় ৬৫,০০০ টকা ৰাজহ সংগ্রহ কৰাৰ বিপৰীতে ছিণ্ডিকেট চক্রই দৈনিক দহ লক্ষাধিক টকা অবৈধভাৱে উপার্জন কৰে৷
বাংলাদেশত শুকুৰবাৰ আৰু ভাৰতত দেওবাৰ চৰকাৰী বন্ধ হোৱা হেতুকে প্রতি সপ্তাহৰ এই দুটা দিনক বাদ দি মাহৰ ২৪ দিনেই বাংলাদেশলৈ সোণাহাট বাণিজ্য কেন্দ্রৰ যোগেদি শিল ৰপ্তানি হৈ আছে৷ তেনেক্ষেত্রত ছিণ্ডিকেট চক্রই বাংলাদেশলৈ অবৈধভাৱে শিল সৰবৰাহৰ নামত মাহিলি ২ কোটি ৪০ লাখ টকা উপার্জন কৰি আছে৷ বক্সিৰহাটত পৰিবহণৰ চে’কগে’ট বন্ধ কৰি দিয়া হৈছে যদিও অভাৰল’ডিং ট্রাকৰ পৰা পৰিবহণ বিভাগৰ বিষয়া-কর্মচাৰীয়ে নিয়মিত ধন সংগ্রহ কৰি আহিছে৷ বক্সিৰহাট আৰু সোণাহাটত আৰক্ষী-প্রশাসনৰ নাকৰ তলত চলি থকা ছিণ্ডিকেটৰাজৰ বিষয়ে দিছপুৰ জ্ঞাত হয় নে নহয় সেয়া প্রশ্নৰ বিষয়৷
নে শাসকীয় বিধায়কৰ ছাঁ দেখি দিছপুৰৰ বৰমূৰীয়াসকলে মৌনতা অৱলম্বন কৰিছে, সেয়া ৰহস্যৰ বিষয়৷ আনহাতে ৰাজ্যত শিলৰ নাটনিৰ সময়ত ভূটানৰ পৰা আমদানিকৃত সামগ্রীবিধক লৈ ৰাজ্যত কিয় ছিণ্ডিকেট গঢ়ি তুলিবলৈ চৰকাৰে সুৰুঙা দিছে তাক লৈও সচেতন মহলৰ মাজত প্রশ্ন উত্থাপন হৈছে৷ উল্লেখ কৰাটো সমীচীন যে ৰাজ্যৰ উত্তৰ-পশ্চিম প্রান্তত ভূটানৰ শিলে ঘৰ-পথ নির্মাণত চাহিদা পূৰণ কৰি আহিছে৷
No comments:
Post a Comment